E Kemper ez eus 5350 plasoù parkañ, 2600 plas digoust en o zouez, setu ez eo pourvezet mat-tre.

E kreiz-kêr Kemper ez eus 14 parklec’h ha tri zakad parkañ : un takad ma ranker paeañ (pad berr hag etre), un takad parkañ reoliet gant ur pad hirañ (kantenn europat) hag un takad digoust.

Tres parkañ

Emeur o paouez embann un tres parkañ nevez. Eeun, sklaer hag akomod-kaer eo : diouzh ar pad ho pez ezhomm e tiskouez deoc’h pelec’h parkañ ho karr gwellañ marc’had.

Parkañ : ar pezh a zo cheñchet abaoe ar 1añ a viz Genver 2018

Adreizh vroadel ar parkañ da baeañ er straedoù, lakaet gant ar Stad, zo o ren abaoe ar 1^añ a viz Genver 2018. Ma ne baeer ket pe ma ne baeer ket a-walc’h, ne vo ket lakaet « telloù-kastiz » ken gant ar polis. En o lec’h e vo un « treuziad goude-parkañ », lakaet gant ar strollegezh.

Evit aesaat ar cheñchamant-se, na felle ket da gêr Gemper ober, ez eus bet graet meur a dra abalamour da aesaat ar parkañ ha da greñvaat dedennusted kreiz-kêr.

Eurdeizieroù nevez, boazioù nevez

Eeunaet ha dizanvezelaet eo pep tra : n’eus ket ken tikedoù da lakaat ouzh ho kwerenn-dal. Hiviziken e skrivit niverenn ho plakenn-varilh war an eurdeizier evit diskouez piv oc’h.

Gant-se e c’hall gwazourien ar c’hontroll gwiriañ hag-eñ eo reizh ho paeamant gant o zermenell.

Ma chomit parket re bell pe ma na baeit ket e rankoc’h paeañ un treuziad goude-parkañ (TGP) :

• 17 € d’ar muiañ ma paeit dindan 72e,
• 35 € ma paeit diwezhatoc’h.

Kemerit tro eus ur c’hardeur digoust div wech an deiz

Evit prenañ ho tefotachoù pe kas ho pugale d’ar skol ho pez ur c’hardeur digoust bemdez, bremañ. Adalek ar 1^añ a viz Genver a vo daougementet kement-se : gwir ho po da gaout ur c’hardeur digoust diouzh ar mintin hag ur c’hardeur digoust d’enderv.

Eeun eo : trawalc’h eo skrivañ ho niverenn varilh en eurdeizier.

Er straed Grallon ha war ar blasenn Alexandre Massé ez eus pevar flas arsav prim (30 munut digoust). Merket int gant bonnoù lugernus.

Paeit a-bell diwar forzh peseurt eurdeizier e kêr pe gant an arload Whoosh

Ma’z oc’h parket er penn all da gêr, n’eo ket dav mont betek eno evit paeañ ar parkañ ouzhpenn ! Gant niverenn ho plakenn-varilh e c’hallit astenn hoc’h amzer parkañ diwar forzh peseurt eurdeizier e kêr, evit 2 eur d’ar muiañ. Gallout a rit ivez astenn pe arsaviñ ho parkañ gant an arload Whoosh.

Arabat ankouaat

1. Digoust eo parkañ bepred e straedoù Kemper etre 12e ha 2e gk ha war-lerc’h 5e gk.

2. Difennet groñs eo parkañ kirri en takad-bale dindan boan a dell-gastiz (gwelet amañ dindan).

3. Ar felladennoù, estroc’h eget ar re a denn d’ar parkañ n’eo ket bet paeet, a chom e karg ar polis : parkañ direnkus, parkañ difennet, implij plasoù miret evit tud zo. Evito e c’haller lakaat telloù-kastiz betek 135 €.

4. Evit ar parkañ hir (ouzhpenn 2e), grit kentoc’h gant ar 1394 a blasoù parkañ a zo e klozioù pe e savadurioù.

Prizioù lakaet

Prizioù en takadoù ma ranker paeañ

Enno e c’haller parkañ betek 2 eur, ha 0,50 € zo da baeañ d’an nebeutañ, eus 9 e da 12 e hag eus 2 e gk da 5 e gk.

Ma chomer parket re bell, hiviziken, e ranker paeañ un treuziad goude-parkañ (TGP) e 17 euro evit an TGP digresket adalek 2e15 parkañ hag e 35 euro adalek 2e30 parkañ.

An neb a bae an TGP dindan 72 eur a vo lakaet dezhañ priz an TGP digresket a 17 euro, a vo tennet anezhañ ar pezh en deus paeet dija evit parkañ.

Klemm enlinenn (RAPO)

Amoug melestradurel diagent ret

Ret eo d’an neb a fell dezhañ elbikat ouzh paeamant un treuziad goude-parkañ (TGP) ober un amoug melestradurel diagent ret (Amdk) digant Kêr.

Vignetenn evit an annezidi

An dud zo o annez pennañ er straedoù evit an dud war droad er c’hreiz-kêr hag er straedoù en takadoù ma ranker paeañ a c’hall bezañ gwerzhet ur vignetenn « annezad » dezho (10 €), gant ma tiskouezint teulioù kantreizhañ. Talvezout a ra e-pad bloaz (bloavezh keodedel, eus ar 1^añ a viz Genver d’an 31 a viz Kerzu).

Peget e vo ar vignetenn-se ouzh gwerenn-dal o c’harr, ha dre-se e vo digoust ar parkañ evito eus 9 e 00 da 10 e 00 hag eus 4 e 30 da 5 e 00 en takadoù ma ranker paeañ.

Teulioù kantreizhañ evit goulenn ur vignetenn annezad :

• kartenn c’hris ar c’harr, a rank klotañ ar chomlec’h warni gant hini an annez ;
• taos war al lojeiz er bloavezh a zo o ren pe er bloavezh kent, pe, ma ne vez ket, kevrat annez e talvoud pe testeni prenañ gant un noter (pa vez annezet an den nevez zo, dindan bloaz) ;
• fakturenn EDF/GDF pe fakturenn bellgomz nevez a-walc’h.

Ar parklec’hioù kloz

An Tour d'Auvergne : 230 plas, da baeañ war an deiz etre 7 e 30 ak ha 7 e 30 gk, digoust da noz etre 7 e 30 gk ha 7 e 30 ak.

Maréchal de Lattre de Tassigny : 160 plas, digor ha da baeañ etre 7 e 30 ak ha 7 e 30 gk evit an implijerien ordinal ha 24e/24 evit ar goumananterien.

Park kloz ar Stêr-Deir : 380 plas, da baeañ war an deiz etre 7 e 30 ak ha 7 e 30 gk, digoust da noz etre 7 e 30 gk ha 7 e 30 ak.

Ar parklec’hioù dindanzouar hag ar parklec’hioù dindan an amzer

C’hoariva Kerne : 435 plas dindanzouar.

Teodor ar Harz : 194 plas dindan an amzer.

Da baeañ war an deiz ha da noz. Digor eus 7 e 30 ak ha 7 e 30 gk.

Koumanant

Da gemer digant penn parklec’h C’hoariva Kerne, plasenn an Tour d’Auvergne dindan ar c’hoariva. Pgz 02 98 64 92 55. Eurioù digeriñ : etre 7e30 ak ha 7e30 gk.

• Evit an annezidi : 32 € ar miz, 96 € an tri miz, 384 € ar bloaz.
• Evit ar re all : 65 € ar miz, 185 € an tri miz, 740 € ar bloaz.

Ur priz hepken evit ar c’houmanantoù da barklec’hioù ar Stêr-Deir ha De Lattre de Tassigny adalek ar 1^añ a viz Genver 2018 : 32 € ar miz, 96 € an tri miz, 384 € ar bloaz.