An Novomax zo ul lec’h gouestlet d’ar seniñ ha d’ar skignañ sonerezh. Er Pol sevenadurel Max Jacob emañ ha meret eo gant ar gevredigezh « Polarité[s] » . He c’hefridi eo harpañ ar sonerien (amatourien pe tud a vicher) tro-dro d’ur raktres arzel ha sevenadurel en ur ginnig dezho servijoù a bep seurt :

• ambroug arzel : pleustriñ hag enrollañ ;
• stummerezh hag obererezh sevenadurel : kentelioù gitar, kan, gitar-boud, toumperezh, sonerezh elektronek, abadennoù er skolioù ;
• titouriñ hag harpañ ar redoù-micher : titouroù war ar gwir (gwirioù oberour, produiñ leurenn / pladennoù…), dalc’had teulioù, harpañ raktresoù (klask arc’hant, krouiñ grafek, heuliañ ar sevel pladennoù, web…) ;
• skignañ : koulzad sonadegoù en Novomax, Gouel ar sonerezh…

En Novomax ez eus pemp studio pleustriñ hag enrollañ, teir sal-gelenn, ur sal evit ar skol sonerezh ha teatr, hag ar C’hlub, ur sal sonadeg ma c’haller degemer etre 100 ha 390 den.

Ar C’hlub a zegemer lazioù evit pleustriñ hag arvestoù ha sonadegoù bihan digor d’an holl. Salioù melestradurel ar gevredigezh « Polarité[s] », pol-departamant ar sonerezh a vremañ, a vez kavet war al lec'h ivez.

Talbenn an Novomax zo gwerennoù outañ ha digor eo war an diavez. En un hall bras plijus e vez degemeret an arvesterien hag arvesterezed. Ar savadur zo eeun ha leun a ster war un dro gant e wiskad koad kistin ha tal d'ar c’hoariva Max Jacob. Mat-kaer eo ar c’hleved ennañ.

Skoazellet eo ar Gevredigezh « Polarité[s] » gant kêr Gemper, Kuzul-departamant Penn-ar-Bed ha Rannvro Breizh.