Al label kêr arz hag istor

Al label « kêr arz hag istor » zo gant kêr Gemper abaoe 1989, ar bloavezh ma voe sinet an emglev kentañ savet asambles gant Ministrerezh ar Sevenadur hag ar C’hehentiñ.
Gant an emglev-se e vez roet ur framm d’an obererezhioù da vevaat ha da dalvoudekaat ar glad, lakaet ar palioù da dizhout ha resisaet an traoù a-fet budged.
Abaoe 1989 emañ Kemper e-barzh rouedad vroadel ar C’hêrioù hag ar Broioù arz hag istor. Gant ministrerezh ar Sevenadur hag ar C’hehentiñ e vez roet al label-se, hag anavezet eo drezañ glad kêr : ar savadurioù, an istor hag ar sevenadur. Gwarantiñ a ra barregezh an heñcherien-prezegerien ha kalite oberoù servij ar glad.

Servij bevaat ar glad

A-hed ar bloavezhioù ez eus bet savet ur skipailh evit lakaat an holl oberoù liammet ouzh al label da dalvezout : aozañ gweladennoù, lakaat war-sav raktresoù pedagogel, diskouezadegoù…

Ti ar glad

E lein plasenn an Amann e vez gwelet an ostel anvet “Ostel Koadbili”. Dont a ra e anv eus ur chaloni, Jean-Jacques Archambault Provost de Boisbilly (1735-1786). Doktor war an doueoniezh eo bet er Sorbonne, vikel-meur eskopti Roazhon, abad Le Tronchet ha chaloni Kemper. 

Perc’henn e oa war unan eus al levraouegoù gouiziekañ e Kemper, ha gantañ e oa bet savet un tres eus an iliz-veur e 1770, anezhañ unan eus ar mammennoù pouezusañ war an iliz-veur a-raok an Dispac’h.

Unan eus skouerioù ostelioù Kemper, etre ur porzh hag ul liorzh, eo : en em astenn a ra betek chapel skolaj ar Jezuisted, ha kaer-kenañ eo ar gwel war kêr pa vezer ennañ. A-hend-all ez eus un toullad elfennoù glad eus ar c’hentañ gant an ti, da skouer un talbenn brav eus ar 17vet kantved gant ur rizenn dantelezet hag ur balkon gant un houarnaj eus an 18vet kantved. War an doenn e c’haller gwelet div sichenn siminal uhel e mein benet ha daou veg kandailh plom e stumm togennoù korintek.

En diabarzh e c’haller gwelet c’hoazh koadajoù brav eus an 18vet kantved hag un oaled e marbr gwenn eus eil lodenn an 18vet kantved. Bep bloaz e vez aozet gweladennoù er savadur-se e-pad trede dibenn-sizhun miz Gwengolo da-geñver Devezhioù ar Glad.

Abaoe miz Mezheven 2005 e ro bod an ostel prevez-se d’ar servij bevaat ar glad hag ar glad, ha deuet eo da vezañ evel-se « Ti ar Glad » : aesaat a ra mont en-dro ar servij, gant ur gorread ouzhpenn 200 m². Al lec’h ma loc’h ar gweladennoù heñchet eus kêr hag ul lec’h degemer evit ar skolidi eo ivez. Al lec’h meur-se eus savouriezh hag istor Kemper a vez lakaet da advevañ evel-se gant Ti ar Glad.